තරුණයෙකුට තවත් තරුණයින් පිරිසක් විසින් සවලකින් පහර දෙනු ලබන වීඩියෝවක් ඉකුත් දා සමාජ මාධ්ය පුරා සංසරණය වීමෙන් පසුව ලද පැමිණිල්ලකට අනුව එම පහර දීමට සම්බන්ධ පිරිස අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාරගත කර තිබේ.
මෙම පහර දීමට අදාළව ප්රසිද්ධ නිරූපණ හා රංගන ශිල්පිනියකගේ පුත්රයෙකු ද අත්අඩංගුවට ගෙන ඇති අතර ඔහු ද මේ වන විට රිමාන්ඩ් භාරයේ පසුවේ.
ඒ හේතුවෙන් මෙම සිදුවීම සම්බන්ධයෙන් වැඩි පිරිසකගේ අවධානය යොමුව ඇති අතර, එහි පසුබිම පිළිබඳව සොයා බැලීමට බීබීසී සිංහල පහර කෑමට ලක්වූ තරුණයාගේ මව සම්බන්ධ කර ගත්තේ ය.
මෙම සිදුවීම මීට මාස දෙකකට පමණ ඉහතදී සිදුවූවක් බව තරුණයාගේ මව ආර්.වී.එම්. රාජමන්ත්රී බීබීසී සිංහල වෙත කියා සිටියා ය.
"යාළුවෙක් එක්ක බයික් එකට කෑල්ලක් ගේන්න ගියේ. වැස්ස නිසා තමයි රාජගිරියේ, අඹගහ හන්දියේ ගැරජ් එකක් ගාව නතර වෙලා තියෙන්නේ. නතර වෙලා ඉද්දි තමයි ගැරජ් එක ඇතුළට ඇදගෙන ගිහිල්ලා ගහලා තියෙන්නේ."
මෙසේ පහර දීමට හේතු වී ඇත්තේ පහර කෑ තරුණයාගේ මිතුරන් පිරිසක් මීට ඉහතදී පහර දුන් තරුණයාගේ යතුරු පැදියකට කකුලකින් පහර දීමේ සිදුවීමක් බව ඇය පැවසුවා ය.
මෙම සිදුවීමෙන් අනතුරුව, පහර දෙන අයුරු දැක්වෙන වීඩියෝවක් මව සමාජ මාධ්ය ඔස්සේ දැක ඇති අතර පසුව ඒ පිළිබඳව තම පුත්රයාගෙන් විමසා දෙපාර්ශවය සාමදාන කළ බව ආර්.වී.එම්. රාජමන්ත්රී සඳහන් කළා ය.
කෙසේ වෙතත්, තමන් සමාජ මාධ්යවල දුටු වීඩියෝව තම පුත්රයාට "අමානුෂික ලෙස පහර දෙන" කොටස් නොතිබූ බව ඇය පැවසුවා ය.
BBC සිංහල